【有片:勁過香港?】內地「秒速」偵測路面異常 助減輕塞車情況

文章日期:2019年5月30日 17:16

近年香港提出「智慧出行」,但早前西隧管制區發生車禍,原因是有貨車死火近1小時無被拖走,最終釀成意外,西隧被指未能及時監察,其實對比本港,內地早已開始引入大數據實時監察系統,利用視像掃描和GPS定位等管理公路,甚至可以1秒偵測路面異常。

內地收費道路普遍,每條道路長度以數十公里計,所以監察及管理車流極其重要,新創建(0659)旗下杭州繞城公路有個叫「杭州城市大腦2.0」項目,他們的監察中心更設有即時數據儀表,車流、平均車速及個別路段的堵塞情況都一目了然。

究竟呢個項目有咩作用呢?當公路上有汽車「死火」、或者車速突然減慢,監察中心螢幕就會「秒速」咁,在1秒內彈出影像,當值人員就會即時處理,務求路路暢通。

車行得太快被影快相就聽得多喇,原來係內地,車輛車速太慢都會視為「阻街」,而呢啲情況一般都會發生係超重嘅貨車身上,所以內地貨車經過公路收費處時會按重收費,逐一為貨車磅重,如果超重仲可能會叫你返轉頭,新創建仲話,寧願賺少一架超重貨車的道路費,都希望保持道路暢通。

內地流行電子錢包,不過只有手機支付並不足夠!新創建透露,現在杭州繞城公路接受現金、電子錢包支付寶及ETC裝置(電子收費系統),類似香港的快易通(Autotoll),而現金、支付寶付款時間相若,均要「停車、付款或掃碼、開車」,所以希望今年內將ETC裝置付費佔比提高至9成,加速整個流程。

撰文:李哲毅‧杭州

其他報道:

【中美角力】中國會否限制蘋果報復美國?商務部咁回應...

【亞洲最大】現代藝術博物館首進駐大中華區 8月落戶K11

【股價異動】安踏被Blue Orca睇淡 曾挫12.8%

【有片】眼鏡88葵涌開智能店 簡單步驟自助買眼鏡