【財經花生】甘比10歲長女年做10萬元生意 啲錢會點用?

文章日期:2019年5月24日 18:00

教仔(或教女)好難,但其實最重要可能係以身作則。「大劉」劉鑾雄太太、女首富「甘比」陳凱韻有三個仔女,富豪家族嚟講,小朋友好早識揾錢可能唔奇,甘比大女Josephine今年先10歲就已經做到10萬蚊生意,更難能可貴嘅係,佢賺咗錢後,係選擇將錢捐晒岀去。

甘比今日同傳媒食飯,講到Josephine舊年迷上「鬼口水」玩意,玩之餘仲喺父母幫忙下,舊年9月開始喺皇室堡商場放置咗一部「鬼口水」嘅自動販賣機,唔夠一年生意額已經有成10萬蚊。換咗普通小朋友可能會諗用錢買咩好,但Josephine就主動提岀想捐錢幫助其他有需要嘅人,最終就捐咗去爸爸劉鑾雄名下嘅慈善基金。

【逃犯條例】甘比:支持政府決策 若香港有合適項目會投資

Josephine會有咁嘅選擇,可能同甘比平時身教有關。甘比而家經常搞慈善活動,幫助老人、小朋友同殘障人士,例如帶家境唔好嘅小朋友去不同地方遊玩,探訪劏房家庭等等;女首富原來好眼淺,講到探其中一個不願接受捐助的太太時,眼紅紅仲流咗滴眼淚。

佢話自己三個小朋友家境好,所以經常透過講解同睇video,甚至而家去探訪、做慈善都帶埋仔女去,俾佢哋了解到好多其他人生活如何困難。或者係因為咁潛移默化,令Josephine願意將自己賺到嘅錢捐岀。

不過講到湊仔女經,甘比其實同普通媽媽分別不大。講到佢「女首富的一天」,原來佢每個工作天都要6點半起身,送大女同大仔返學;8點半要返到屋企湊而家未夠兩歲嘅細女,之後食個早餐就要返公司做嘢;做到中午食晏快食個lunch,又要再岀發湊仔女放學,然後又再返公司工作,如果工作太多未處理完,有時候甚至要帶返屋企,同事會上門攞文件俾佢簽;然後喺屋企照顧三個仔女同佢哋傾偈,忙碌的一日就咁完結。

記者:鄧偉忠

其他報道:

【公司動向】聯想擬3億美元深圳設廠建孵化產品

【A股收市】上證收升不足1點 全周累跌近1%

【國策刺激】財政部推出車輛購置稅公告 車股向上

【事隔半月】Mega Expo指沽空報告失實 今午復牌

【本港拆息】本港銀行同業拆息全線抽高

【華為風波】日本亞馬遜停售華為產品

【自食其果?】IMF報告指關稅成本近乎全由美國進口商承擔