消息:「行山六子」被警告 可能遭扣花紅

文章日期:2020年2月15日

【明報專訊】本周初網上流傳恒生銀行(0011)有6名管理培訓生(MT)喺在家工作(Work From Home)期間行山,仲up相上社交平台,最終東窗事發。有消息人士同小琴講,恒生銀行決定向「行山六子」出警告信,但就唔會炒魷魚,不過就好可能會扣花紅。

恒生發言人昨天回覆查詢時話,早前已就相關事件作回應,再沒有補充。本周初恒生已表示,會按內部程序同指引嚴正處理。

恒生銀行對MT要求多多,除咗要有強烈「自我激勵、追求卓越嘅動力」,仲要成為一個合作、開放同正直嘅榜樣。今次行山六子成功化身反面教材,恒生決定發出警告信,意味佢哋今次「Best WFH activity」將會記錄在案,作為日後評估嘅根據。

另外,匯豐及恒生下星期二公布業績後,應會宣布今年加人工同花紅金額,行山六子相信喺當日獲通知花紅剩番幾多,如果有的話。

行山六子早前上載到Instagram的照片標上「Best WFH activity(最佳的在家辦公活動)」、「人在野」等字句,有網民笑言,可以將work from home(在家工作)簡寫WFH的詮釋改成work from hill(在山工作)。

email:piano@mingpao.com

[小琴密語]