四叔退休 30字告別小股東

文章日期:2019年4月19日

【明報專訊】恒基地產(0012)同煤氣(0003)主席「四叔」李兆基,較早前已喺公司公告講明自己因為年事已高,考慮退任主席一職,由兩個仔李家傑同李家誠頂上接棒。佢將安排喺5月28號嘅股東會上交代。如無意外,今年係「四叔」做主席時出嘅最後一份年報。

佢喺年報嗰度無乜特別感言之類,只係喺佢講退任一節裏邊,好簡單咁提到「本人藉此衷心感謝各股東數十年來對本人擔任主席的信任及鼎力支持」,加埋先30隻字,言簡意賅,瀟瀟灑灑。四叔做咗咁多年主席,公司市值同盈利係咁升,又年年送紅股兼加派股息,股東無理由唔支持佢,簡直係多謝佢都嚟唔切啦!畢竟今年四叔已經90歲,公司業務繁多,仔女都已經成熟同熟悉公司嘅運作,上晒軌道,理應可以分擔吓工作,喺適當時候畀老父享吓清福囉!

[小琴密語]