湯文亮:銷監局失職 政府用錯人

文章日期:2019年4月15日

【明報專訊】近日招標賣樓搞到地產界滿城風雨,政府最後都要出招管制,我唔知道政府是有心抑或無意,在復活節賣樓黃金檔期前夕才出手,將地產商的賣樓步伐打斷,復活節都唔知道用唔用招標賣樓。一般人可能唔知道,復活節其實是小陽春尾聲,如果復活節唔賣樓,五月六月被稱為五窮六絕,鬼佬都會話「Sell in May and walk away」,除非大幅降價,否則銷售情况不會太理想。

有老友同我講,政府並不是有心整蠱地產商,為了監管新樓銷售,已經成立了一個新樓銷售監管局,專人監察地產商在推銷新樓時有沒有違規,可惜用人不當,銷監局專員是從食環署調過來,以管理小販手法來管地產商,根本九唔搭八,所以,就算政府內部都認為今次是銷監局失職,但我不會同意,我認為是負責政府人事任命的部門失職,搵管理小販的人管地產商,能夠做好成績都冇人信。

招標令人看不清真正售價

如果大家認為招標是賣新樓的最好方法,其實是錯到不得了,因為每一次招標所得到的價,都是反映最高價,如果樓市沒有變化,招標價只會愈來愈低,所以地產商唔想公開真實樓價,甚至會愈賣愈貴,不過回贈就會愈來愈多,誰不知政府棒打鴛鴦,我相信如果地產商公開過去幾個月招標賣樓的折實價之後,就會發覺樓價太過參差,樓下隨時會貴過樓上20%,一定會出現很多訴訟,我都唔知道點樣收科。

二手買家參考「一手價」易被誤導

其實,在地產界這並不是什麼秘密,不過一般評論員都唔會講,就算自認講真心話的評論員都唔會講出真相。

今次除了買新樓的人是受害者之外,不少買二手樓的人,亦因為睇到每一次新樓盤招標出售,售價愈來愈高而買樓,他們可能是最大受害者,因此他們不可能要求地產商賠償亦不可能取消交易。如果他們睇清楚新樓價,可能比所買了的二手樓低了一截,想唔暈都唔得。

紀惠集團行政總裁

[湯文亮 敢說反話]

明報影片