百富勤清盤清足20年

文章日期:2019年4月4日

【明報專訊】1998年亞洲金融風暴中倒閉嘅百富勤投資,唔經唔覺原來清盤清足20年。根據港燈(2638)最新股東通函所載,霍大班(霍建寧)喺當年曾任董事嘅華資最大投資銀行百富勤投資,原來由1998年3月18號起開始強制清盤,到2018年12月17日完成清盤同解散,前後過程歷時20年之久。通函又講到,清盤人接納嘅總索償額,原來高達152.78億元,咪話唔驚人。

當年華資富豪組成唔同投行,如李嘉誠、榮智健等支持發起百富勤,羅旭瑞、已故徐展堂發起新中港,仲有四洲主席戴德豐同蔣家投資嘅太平洋興業,最終唔係清盤就係賣盤,今日行內已變成中資同外資嘅世界。

總索償額達152.78億

百富勤當年全盛時期,可與美資、英資等大行匹敵,不過唔好彩嘅係,錯信定息部有「魔童」之稱嘅李奭鎮,一鋪重注投資印尼的士公司Steady Safe嘅2.6億美金無擔保債券,遇上印尼盾大貶值,對方無法兌換足夠美金還錢,加上百富勤亦喺當地落重注,對冲不足下,連累公司流動性不足而倒閉,其中投行部就賣畀法巴延續生命。不過,霍大班早喺1998年1月辭任,港燈今次股東通函所載,就為百富勤嘅結局正式畫上句號。

[小琴密語]

明報影片