盛傳離婚 奶茶妹辭任劉強東公司

文章日期:2019年4月4日

【明報專訊】經歷「性侵風波」後,京東創辦人劉強東同「奶茶妹妹」章澤天曾被傳離婚,最新就有內地傳媒發現,章澤天辭去重慶嫩綠茶藝有限公司董事職務,而呢間公司係由劉強東間接持有。

根據內媒統計,現時「奶茶妹妹」喺10間公司仲有職務,當中8間擔任董事長、董事或經理等主要職務,包括京東數字科技控股有限公司等,多數都同劉強東有關係。

其實早在2月14日,有內地傳媒指兩人已經離婚,劉強東嘅律師就立即出聲明,話言論係無中生有,故意捏造嘅謠言。不過2月21日,兩人一齊出席開幕儀式嘅「京東JD+智能奶茶館」,就突然貼出通知,即日起停止營業。京東當時回應,隨着市場環境變化,奶茶館作為創業孵化器,形式都有所改變。

其實性侵風波後,兩人齊齊公開亮相只限於去年10月英女王孫女婚禮。今次章澤天辭去劉強東旗下公司董事職務,會唔會又有一番啟示?

email:piano@mingpao.com

[小琴密語]

明報影片