哈根達斯前高層梁可婷轉投大家樂

文章日期:2019年3月29日

【明報專訊】新人事新作風!大家樂(0341)噚日公布,委任梁可婷(Piony)擔任行政總裁(速食餐飲業務),主管香港大家樂快餐同一粥麵業務。Piony加入大家樂前,曾經做過通用磨坊(General Mills)北亞暨東南亞區董事總經理,即係哈根達斯(Häagen-Dazs)同灣仔碼頭水餃母公司。

Piony會領導大家樂快餐同一粥麵團隊,制定整體業務策略、規劃及發展,大家樂CEO羅德承話,Piony有敏銳市場觸覺及豐富管理經驗,期望佢可以推動香港大家樂快餐同一粥麵業務。睇返資料,Piony以往成日接受傳媒訪問,講解哈根達斯嘅發展,相信快餐業務難唔到佢嘅。

其實近年飲食業競爭相當激烈,管理層都相當搶手,就好似大家樂上一任行政總裁(速食餐飲業務)劉達民,上年就過檔去譚仔,𠵱家係譚仔國際行政總裁,近日同傳媒茶敘,仲提到目標係帶譚仔衝出香港。

[小琴密語]