業績意外被泄 IGG急急腳停牌

文章日期:2019年3月7日

【明報專訊】踏入3月業績期旺季,每日都有好多公司出業績,手遊股IGG(0799)原定噚日公布全年業績,不過最「驚喜」係,IGG公關公司皓天財經(1260)嘅手機App「皓天雲」,朝早已經上載業績報告PPT,重要數據通通流出,包括純利、每股盈利、第二次中期息等,搞到集團急急腳停牌,今次真係「GG」了。

原定噚日公布全年業績

IGG停牌通告話,要等待澄清報章報道以及公布全年業績。翻查IGG以往出業績嘅時間,多數係收市後晏晝五六點,今次就去到夜晚9點先出業績。集團嘅澄清公告指出,手機App內嘅相關財務資料係因為公關公司技術故障引起,強調內容未經董事會批准或授權,股份今日復牌。

其實平時業績會後,公關們都會邀請某啲傳媒留低,舉行俗稱「細圍」嘅採訪,公關噚日就同小琴講,因為突發情况所以取消細圍,記者會就會如期舉行。事出突然,相信公關公司一定係今日記者會嘅焦點。

[小琴密語]