兒童打《王者榮耀》 須家長「解鎖」

文章日期:2019年3月2日

【明報專訊】近年內地迫切解決「打機成癮」問題,首當其衝係騰訊(0700)旗下吸金力強嘅遊戲《王者榮耀》,2015年上市以嚟吸引一班中小學生打機入晒迷,搞到官方都要營運商出手打擊。騰訊噚日公布,要加大對未成年青少年健康上網保護,最新推出「兒童鎖模式」,未滿13歲玩家要由家長解鎖先玩到遊戲。

須手持身分證拍全身合照

據指,今次騰訊測試全新「兒童鎖模式」,13歲以下新用戶喺首次登陸遊戲之前,將隨機要求進行「兒童鎖」登記認證,需要其監護人完成「解鎖」後先可以進入遊戲。而且解鎖需4樣資訊,包括監護人提供身分證正反兩面照片、監護人手持身分證與未成年兒童一同拍全身合照、親子關係證明及監謢人的視頻認證信息,少一樣都唔得。

北京成都長春已啟動測試

升級嘅措施將分批在12個城市對《王者榮耀》、《刺激戰場》兩款遊戲新用戶展開抽樣測試,首批測試目前已經喺北京、成都、長春3個城市啟動。

一直以嚟,騰訊為回應官方批評,為遊戲增設愈嚟愈多限制,好似限制青年玩家上線時間,又要實名監控,搞嚟搞去都不過想官方放其一馬,但冬天都已經過去,版號仍未獲批,看來騰訊搞再多都於事無補。

[小琴密語]

相關新聞

明報影片