Crostini港島開旗艦 丁世忠帶阿囡撐場

文章日期:2019年2月28日

【明報專訊】連鎖咖啡店Crostini港島旗艦店噚日開幕,小琴喺剪綵儀式仲見到一個熟悉嘅身影,就係早兩日先出業績嘅安踏體育(2020)首席執行官丁世忠,連佢嗰位甚少見傳媒嘅千金(圖)都有出席。開幕邀請咗藝人陳凱琳,佢件衫仲係安踏近年收購嘅FILA出品,認真捧場!

丁世忠就話自己同創辦人黃光輝係好朋友,今次有投資「一點點」,不過就冇透露持股幾多,剪綵後冇耐就走咗。旗艦店位於時代廣場,剛剛好喺FILA及FILA KIDS門店之間,黃光輝就強調選址實屬巧合。黃光輝又話,自己以前從事製衣業,幾年前經朋友介紹認識咗丁世忠,大家都係福建人,不過業務冇合作過,入股都係最近嘅事。至於Crostini嘅業務發展,黃光輝話現時一共有25間分店,今年會開多幾間,不過暫時未有計劃上市。

[小琴密語]