遠展邱達昌:港地產商物色大灣區商機

文章日期:2019年2月26日

【明報專訊】粵港澳正推動大灣區發展,一邊廂香港興業(0480)副主席兼董事總經理查懋成早幾個月先話,叫人上大灣區住係「風涼話」,不過有「老虎仔」之稱嘅遠東發展(0035)主席邱達昌(圖)就話,將來香港地產市場可以視為大灣區嘅一部分,市場會更大,入場成本可以降低或得到緩衝,作為發展商有機會可以借助新嘅玩法重新部署咁話。

佢仲話,遠展會去到較多香港人喜歡去嘅大灣區城市,例如中山,搵吓地產、酒店同停車場嘅發展機會。佢又話,將來香港喺大灣區內,唔可以視香港為單獨市場咁睇,年輕人有較多商機。遠展近年去國際市場搵食較多,喺大灣區內,只得香港同廣州有幾個樓盤發展緊,較多地盤喺上海。當個個發展商都衝入大灣區時,唔知遠展會唔會攞上海錦秋花園啲排屋,或外國啲高層公寓倒模攞過去大灣區「省招牌」,大家都拭目以待。

eedil:piano@mingpao.com

[小琴密語]