陳德霖陳年畢業照曝光 被指曾任「情聖」

文章日期:2019年2月23日

【明報專訊】金管局總裁陳德霖早前宣布退休,隨即被人爆料,話佢原來以前係「情聖」!並唔係話佢有咩緋聞,只係佢1976年喺中文大學畢業時,同學錄入面,原來有一段陳德霖的簡介(圖),噚日被人擺上facebook專頁,供大家欣賞。

據facebook專頁「CUHK Secrets」噚晚上載嘅一張相,稱出自《礪︰1976》,當年介紹陳德霖「因行為倜儻不凡,被尊為『陳記』。曾到美國及日本二國促進國際文化交流。曾任『情聖』一職,但後因武功盡失被黜免,現為呆鳥集團低等隨員。早年曾患有『買書狂熱症』,幸好三、四年級缺乏物質基礎而被治癒,但仍貴為本班藏書比賽季軍,僅(次)於才子卓恩及光爺﹗運動則樣樣皆能,但無一為精。」小琴翻查當年陳總同屆同學名單,呢位「才子卓恩」,好可能就係麥堅時國際律師事務所前任合伙人、𠵱家擔任中行(3988)獨董嘅梁卓恩,至於「光爺」身分就較難考究了。

翻查資料,2012年一班中大崇基書院校友聚會,慶祝加入礪社40周年,當時陳總也有出席。估計這份《礪︰1976》就是1976年畢業生的刊物。雖然陳總平時作風都相當親民,但估唔到佢原來仲有如此青春嘅一面。究竟係邊位舊同學上載呢?睇嚟陳總係時候搵番班舊同學敘敘舊啦!

email: piano@mingpao.com

[小琴密語]