優品360﹕新年最好賣係金莎

文章日期:2019年2月21日

【明報專訊】每逢農曆新年親戚們都會化身「送禮勤」,少不免就係朱古力、曲奇呢啲傳統送禮佳品。今年初上市嘅優品360(2360)噚日舉行新年傳媒團拜,行政總裁許志群就話,聖誕節同埋農曆新年前2至3個星期生意最好,新年最賣得嘅就係金莎朱古力,其次係藍罐曲奇,而且內地遊客同香港人都鍾意買,對現時同店銷售表現好滿意。

他解釋,金莎唔單止新年受歡迎,一年四季都好好賣,因為集團定價「有競爭力」,例如30粒裝的金莎長期都係賣59蚊,平過對手「十幾廿蚊」。雖然集團考慮緊加價至61蚊,但唔擔心會流失生意,因為依然平過市價。

許志群又透露,集團研究緊發展海外市場,希望今年內可以喺澳門開業,因為澳門消費習慣同香港相似,相信唔會只開一間店,議事亭、大三巴或者酒店商場等地方都係集團嘅「心水」位置。優品360主席兼執行董事林子峰話,農曆新年前後都有去巡舖,當中最滿意就係位於元朗、屯門同火車站沿線舖頭,皆因夠晒旺場。佢又話,經濟環境唔好主要影響奢侈品,食品唔會有太大影響,會按照上市計劃擴充分店。

[小琴密語]