深圳大疆機械人賽 逾2萬大學生參加

文章日期:2019年2月21日

【明報專訊】靠航拍機起家嘅內地創企大疆,由2015年起每年都舉辦機械人競技比賽「RoboMaster」,透過理論實踐提升大學生工程專業知識。小琴噚日就去咗大疆參觀,據講比賽今年會喺深圳灣體育館舉行,單係舞台費用就過百萬元,比賽冠軍可以獲得50萬人仔獎金。小琴同一班參賽者交流,都話無乜興趣去香港發展,話深圳係一個適合創新嘅地方。

冠軍可獲50萬人幣獎金

呢個比賽吸引之處,係所有參賽者都可以獲得主辦方嘅技術培訓,甚至可以免費拎到機械人零件,組裝自己嘅機械人,今屆參加嘅大學生人數突破2萬。

曾喺香港科技大學讀書嘅寧延曾經參加過RoboMaster,𠵱家仲加入大疆實習。問到日後會留喺深圳或香港工作,寧延話,深圳喺粵港澳中間交通比較便利,香港比較少輕工業及加工業,製作起嚟深圳會更方便。不過佢覺得,香港對於創業嘅支援好多,包括資金或者孵化器,自己身邊好多朋友都留港創業。

華南理工大學四年級嘅楊思敏就話,自己2017年參加機械人比賽,主要負責電子控制部分,佢覺得唔需要局限自己一定要做技術工作,自己第二年就改為負責做招商經理,幫團隊搵贊助。電子科技大學郝赫就認為,比賽極具特色,吸引咗好多大學生嘗試投身機械人行業。他覺得,近年深圳創科發展急速,吸引好多外省人才流入,佢覺得香港自己培養嘅科技人才水平好高,可以科技驅動創新。

eedil:piano@mingpao.com

[小琴密語]