消失的港交所拜年短片

文章日期:2019年2月1日

【明報專訊】話咁快下個星期二就係年初一,小琴相信好多讀者都已經準備好「收爐」。過去幾年港交所(0388)前主席周松崗同行政總裁李小加都會拍條短片,同大家拜年講句恭喜發財,通常都會略略講吓港交所來年嘅工作重點。小加總裁仲趁舊年係狗年,同兩隻愛犬一齊亮相祝大家新年進步。

不過今年豬年就簡單得多,主席史美倫只係影張相,寫住「恭賀新禧,如意吉祥」,小加總裁都係拎住張「如意吉祥」揮春影張相,就當同大家拜年。今年都有短片睇嘅,不過係港交所一班員工分別用廣東話及普通話同大家講句「恭喜發財」。其實港交所都拍咗幾年賀年短片,反應都唔錯呀,今年無得睇新主席同小加總裁一齊上鏡,實在有點可惜。

[小琴密語]

明報影片