「樓神」趙國雄:行家致電請教開價

文章日期:2019年1月26日

【明報專訊】有長實(1113)「樓神」之稱的執董趙國雄舊年底批今年樓價最多跌兩成,納米樓更跌三成。近期樓市似回暖,唔少更大開紅盤,趙國雄接受now訪問時透露,舊年底市區型樓盤開售前夕,有發展商高層曾致電問佢樓價是否真的會跌三成,佢就話樓價確實有下行趨勢,如果不調低售價或影響銷情,結果該盤確以市價折讓逾兩成開賣。

「200呎太細 不適合人住」

樓神無開名邊個盤,不過去年底開盤的市區樓兼紅盤只得一個,相信讀者都心裏有數。不過小琴就發現,樓神樓市下跌言論見報日子係舊年12月5日,而同日該盤先開價,唔通樓神一早向對方洩露玄機,定係紅盤發展商見到趙樓神都咁預測,就「拿拿臨」開低啲呢?

樓神另一惹網民關注言論,就要數佢話200餘方呎嘅單位太細,不適合人居住,相信不少租客會偏好租住面積較大嘅二手單位。唔少網民都攞返長實旗下項目嵐山曾創下劏盡全城嘅紀錄來比較,揣測樓神可能突然佛心來了。小琴猶記得2014年嵐山開則時,以最細165呎戶型細盡全城,亦帶起了發展商劏房之風,奠定了日後本港成為劏房之城嘅根基。未知是否長實近年鮮有開盤,趙國雄亦淡忘咗往日嘅「威水史」。

email: piano@mingpao.com

[小琴密語]

相關新聞