新地員工救人一命

文章日期:2019年1月25日

【明報專訊】有位個幾月冇見嘅朋友日前打畀小琴,劈頭第一句就話:「小琴,我差啲冇命搵你呀。」冇命咁嚴重,當然要問個究竟,聽朋友講番,佢上個月去新鴻基中心同新地(0016)傾生意,「傾傾吓就眼前一黑,醒返已經喺醫院」。

朋友話聽醫生講返,原來佢心臟動脈栓塞,暈倒之後已經心跳停頓,「好彩新地office有晒儀器,亦有員工識急救,即場緊急處理再送我去醫院咋」,醫生仲話朋友十分好運,病發時剛好遇上會急救嘅人同埋識得用相關器材,否則已經一命嗚呼。

但其實朋友執返條命又豈止好彩咁簡單?聽新地公關講返,公司一向都重視危機應變及緊急事故處理,防患於未然,旗下主要寫字樓物業都備有自動體外心臟去顫器,總部新鴻基中心更加備有同救護車同級嘅便攜式自動體外心臟去顫器、面罩復蘇器及各項專業急救用品,而且全部物管同事都學過點用去顫器,當中一半仲持有「紅十字」認可急救訓練証書𠻹,咁就真係物管「任何仁」都可以救人喇。

[小琴密語]