陳德霖扮大嘥鬼 鼓勵大家用「迎新鈔」

文章日期:2019年1月24日

【明報專訊】國金有無89樓,小琴就唔知啦!不過就知道噚日喺國金二期天台,有大嘥鬼出沒。話說金管局為咗鼓勵大家使用「迎新鈔」,出動到政府最紅嘅大嘥鬼(可能得「任何仁」先有得比),拍咗條短片。

短片就講到,有個「嘥錢男」想喺天台丟咗一箱舊銀紙,但被大嘥鬼及時阻止。大嘥鬼話啲銀紙仲新,可以用嚟封利市。其實唔講唔知,𠵱家去銀行換銀紙封利市,有四成都係呢啲「迎新鈔」,所謂迎新鈔其實係雖然唔係全新鈔但仍整潔新淨嘅銀紙。

昨天起可換1000同500元新款鈔票

咪住先﹗大嘥鬼點解轉咗死性,提倡環保?鏡頭一轉,原來大嘥鬼係由金管局總裁陳德霖扮嘅。估唔到為咗宣揚迎新鈔,陳總都粉墨登場親自上鏡。

話咁快仲有唔夠兩個星期就過年,噚日開始三大發鈔行都畀市民兌換銀紙封利市,今年嘅亮點係可以換到1000同500元新款鈔票,所以都吸引咗唔少人去換㗎。

[小琴密語]