里昂風水預測 港股今年11月最佳

文章日期:2019年1月24日

【明報專訊】中信里昂證券每年初都會為香港股市做風水預測,噚日就公布豬年指數分析,「執杖官」蘇敬培提到,豬年水火相冲,多意料之外嘅事,估計恒指走勢波動,第二季回暖,但第三季就會大跌到9月見底,臨近年底11月破頂。

火相關行業科網股表現好

蘇敬培話,今年係己亥豬年,風水命盤多波動,所以「宜止蝕,不宜追高」;預測新一年,恒指先喺「泥裏打滾,偶爾有急跌」,5、6月陰金相合,市場信心回暖,有錢可賺;但7月中旬勢必低收;9月市場將會出現下半年最大一跌;11月則係本年最佳月份,恒指破頂;12月股市四處蹣跚跌盪,最後以豐收終結。

火狗特朗普 豬年運程唔太好

行業方面,八字圖上火燒全年,預計火相關行業科網股會有幾好嘅表現,電訊、石油副產品和公用事業股前景光明;包括建築、房地產在內嘅屬土行業喺夏季尾表現亦都會唔錯;而旅遊、油漆、物流、酒店同各航運業下半年會乘風起勢;屬金行業如金融、機械,就剋制多於進步啦!

雖然里昂今年嘅生肖年名人預測冇咩特別,不過就有趣地提到屬土羊嘅港鐵(0066),今年要警惕變動,唔好新建線路、或者要注意交匯點。另外,被問到又點睇美國總統特朗普,蘇敬培話記得早幾年有分析過佢屬火狗,豬年運程唔太好,應該多啲浸溫泉、spa等,令思想頭腦更清晰,咁就希望有耐性啲解決中美貿易摩擦啦!

email: piano@mingpao.com

[小琴密語]

相關新聞

明報影片