周大福傳媒春茗搓湯圓

文章日期:2019年1月23日

【明報專訊】臨近農曆新年,好多公司都會搞傳媒春茗,今年周大福(1929)大搞新意思,約埋傳媒朋友齊齊搓湯圓,集團董事總經理黃紹基(基哥)同財務董事鄭炳熙(Hamilton)都有出席。

兩位平時工作咁忙碌,相信都好少入廚房煮嘢食,今次導師示範完點整卡通湯圓,大家就要落手落腳搓湯圓皮、包餡料、畫表情,最後再幫湯圓「點睛」𠻹!雖然基哥試過「大頭蝦」冇包芝麻餡料入湯圓,不過佢同Hamilton都整得有板有眼,甚少要導師出手襄助㗎!

基哥同Hamilton嘅湯圓賣相都好吸引,完全符合「入得廚房、出得廳堂」。小琴問過Hamilton,其實今次係佢第一次整湯圓,以前最接近嘅入廚經驗,已經係包餃子,當時餃子皮都要自己搓,所以都唔簡單。小琴坐喺Hamilton隔籬,見到佢整湯圓個陣好專心,相信無論公事定煮嘢食都難佢唔倒。

[小琴密語]