長江集團周年晚宴 小超人不坐主家席周圍飛

文章日期:2019年1月12日

【明報專訊】長江集團昨晚舉行周年晚宴,亦係李嘉誠退休後,長子李澤鉅(Victor)首次以集團主席身分出席晚宴。據講Victor往年晚宴都是坐主家席,讓同事輪流上前「集郵」,不過今年身分唔同咗,佢都改變玩法,唔坐主家席,改為滿場飛。但係晚宴全場有過百張枱,Victor都冇可能飛勻晒,你估真係叫小超人就曉飛咩,所以就由大會抽出十幾張枱號,等Victor輪流坐落去嗰十幾張枱,同啲同事一齊食飯傾偈,兼且方便同事影相打卡。而被抽中嘅枱號,席上員工除咗有得近距離接觸Victor,仲會有特別獎品,就係金幣一枚畀該枱嘅員工抽獎,抽中咗就真係雙重開心喇。

抽中枱號員工 可獲金幣一枚

另外,長江實業(1113)舊年公布重建中環和記大廈,不少租客據聞已經遷出,多年來駐守和記大廈嘅長和(0001)員工,亦都開始收拾細軟,目標係今個月底前搬過去一條馬路之隔嘅長江中心。據了解今次搬遷涉及超過200名員工,下個月開始就會進駐長江中心47至48樓,同大小李生喺同一幢大廈返工。

email: piano@mingpao.com

[小琴密語]

明報影片