郭思治又轉會 由民眾跳槽帝鋒證券

文章日期:2019年1月1日

【明報專訊】有「股壇大隻佬」之稱嘅郭思治(圖)喺新一年有新開始,佢宣布已經離開民眾金融科技(0279)旗下民眾證券,聽日開始會返新工,跳槽去帝鋒證券出任行政總裁。聽郭Sir講,帝鋒過往主要經營貴金屬買賣服務,去年7月新增證券及資產管理業務,因為同老闆傾過,發現大家理念相似,對方又好有誠意,人事亦比較簡單,就決定過去做開荒牛,幫手發展證券及資產管理業務。

每周返民眾做一集財經台

郭Sir喺民眾嘅時代,最為人所知係搞咗個財經台,不過今次去到帝鋒,佢就只會做一個財經頻道,輕鬆啲,有料先至放上去,但郭Sir話,未來仍然會每星期返民眾做一集財經台節目。

提到民眾金融,2018年真係好似坐過山車,年初一度炒高至2元,點知5月斬倉式暴瀉,跌到變仙股,連郭Sir都要損手,至於係咪呢件事令佢萌生去意呢?咁就真係要問返佢本人了。

[小琴密語]

明報影片