王弼﹕電子煙JUUL有買貴無買錯

文章日期:2018年12月31日

【明報專訊】聖誕節及元旦,假日氣氛濃厚,王弼早就安排收爐,到台北和北海道富良野過聖誕節,不過就在這段期間,美股大幅波動,道指單日動輒六七百點上落,有一日更逾千點,連續幾天這樣,如果習慣盯着股市短炒的人,可能人都癲。

有跟開本欄的讀者,都知王弼自第三季開始大唱要沽空美股,不過標普500指數自2930點歷史高位一直跌到聯儲局議息前的2530點,400點的巨大跌幅,王弼確實有點怕怕死貓彈,因此外遊前把空倉減少。本來,最好是按原訂安排,玩得開開心心,什麼都不看,奈何現今資訊發達,多個WhatsApp群組排山倒海傳來美國像要亡國的信息,我也抵受不住引誘要看看股市,一看,欲罷不能。結果怎樣呢?議息當日標指收2518點,上周五收2488點,跌幅只有30點,但波幅卻有207點!不看,不用失眠,應該是較好的選擇。

在這期間,美股經歷了兩個大奇蹟日,短線要賺大錢不容易,不過我卻把握了一個難得長線投資機會,趁大冧市掃煙仔股,我一向有買煙仔股,點解要再加注?

傳統煙式微 靠加價保盈利

因為美國最大煙草商Altria,買了被喻為「電子煙iPhone」JUUL的35%股權。Altria點解要買JUUL?好簡單,煙仔畀FDA管死,食開的人不會不食(正確地說是不會同一時間大批煙民一同戒煙),不過老的一批始終會死,預期食煙的人會慢慢減少,現在煙仔公司的策略是加價彌補收入減少,就像蘋果的賣機策略,不過有政府加稅配合,令煙草行業極少創新和競爭,煙草公司的策略比蘋果成功。

北美後生仔吸電煙 威脅煙草商

繼續講JUUL,北美的後生仔不吸煙,覺得唔夠型,所以一齊去食JUUL,講到尾,後生仔(其實任何人)總愛找一兩件東西上癮。JUUL也是售賣尼古丁,方法是用一支貌似USB的電子煙加熱,再加水果味之類的添加劑讓人吸食,無臭味,後生仔沒看過萬寶路廣告被洗腦,覺得食JUUL型過食煙好多,總之後生一代個個走去食JUUL唔食煙仔,先至係大煙草商的最大威脅。

至於一些人說Altria買JUUL好貴(128億美元),我想跟大家講,JUUL有一段時間根本看不起Altria,就像黑社會後起之秀覺得坐館係老嘢,遲早取而代之。Altria一路想買JUUL,JUUL就不理,甚至揚言取而代之,最後,JUUL點解唔嫁又嫁呢?

FDA掃場 JUUL投靠Altria

黑社會後生仔以為賺錢只要劈友搞黃賭毒叻就得,不明白黑社會最大難題,係點同「皇氣」和平相處。果然,「差佬」(FDA)真係派人去掃場,搞到JUUL無晒符,開始害怕如果差佬繼續掃場點算。無計可施之下,唯有衰衰咁樣去搵番老叔父(Altria)幫手。你話,差佬究竟係收邊個柯打掃場呢?

𠵱家老叔父入股JUUL,這類型產品除咗後生仔喜歡外,利潤高好多。我覺得老叔父同JUUL,今次係大團圓結局囉!

香港奧國經濟學院院長 fb.com/buytillsuspension

[王弼 投資王道]

相關新聞

明報影片