湯文亮﹕買樓似食大閘蟹 等大造才買

文章日期:2018年12月5日

【明報專訊】友人在幾個月前請食大閘蟹,有個好聽的名字叫「六月黃」,其實是BB蟹,不但只得小小黃,蟹身亦非常削,於是我話膽固醇太高,一年只可以食兩三次大閘蟹,等大造才食,唔好浪費Quota。較早前老友話九圓十尖,九圓啱造,我又話唔食,圓即是乸,蟹膏好似鹹蛋黃一樣,唔覺得好食,都係唔好浪費Quota,到最近公蟹大造,我請食大閘蟹,老友話心領,因為這兩三個月食得太多六月黃及蟹乸,膽固醇太高,醫生唔准再食,明年請早,真浪費。

有很多香港人都好似我老友一樣,明知自己膽固醇過高,不能多食大閘蟹,最好辦法就是等到季尾,公蟹大造,又平又靚的時候才食,但他們大多數都受不了誘惑,食完六月黃食蟹乸,又貴又唔係咁好食,到公蟹大造,又平又靚,他們又唔能夠食。其實,買樓的人有同樣心態,今年初,無論買新樓或者二手樓,都冇乜選擇,買新樓入咗飛之後仲要抽籤,抽得到都未必好,買二手樓仲慘,有錢都只能夠買到二樓後座的單位,慘過食六月黃。

年初買一手樓 慘過食六月黃

近兩個月就比較好,新樓因為認購率不足,有錢可以慢慢揀慢慢買,最緊要是不用抽籤,啱就買,唔啱可以唔買,如果有心買二手樓的話,隨時可以買到一些平靚正單位,不過一定要花些少時間去搵,感覺上都好似食蟹乸一樣,久不久都有一隻唔錯的,不過是可遇不可求。隔多幾個月,大約在春節之後,形勢就會完全不同,將會有多個新樓盤推出市場,樓價不但比現在低,而且會有更多選擇,更多優惠,去到新樓售樓部所得到的待遇,就會感覺到這才是買樓。

春節過後 一手選擇多二手任揀

至於買二手樓,買樓的人會感覺到自己是白武士,救萬民於水火之中,任何不合理的還價都有可能被接受,賣家還會千多萬謝,理由很簡單,因為太多放盤,大家都知道物以罕為貴,點解要在缺盤的時候去買樓,不如等大造才買,就算買唔到都開心。

紀惠集團行政總裁

[湯文亮 敢說亮話]