旗下金融平台財困 海航用機票償債

文章日期:2018年11月15日

【明報專訊】欠債還錢就聽得多,不過欠債還機票你又聽過未?據《華爾街日報》報道,海航旗下金融平台前海航交所,上月提出以機票代金券形式,向投資者償還欠款,代金券可以揀國內航班或者係國際航線,想去加州都得。

其實前海航交所早在今年初已經出現資金困難,所以上個月就推出機票償債嘅方案,每5000元人民幣欠款,就可以換一套機票組合代金券,5年內有效,只可以換海航旗下海南航空,或者係大新華航空嘅航班。根據海航網站,一張面值500元代金券,差唔多等於北京去上海嘅經濟艙票價,而一張3000元代金券,就接近北京去洛杉磯單程嘅經濟艙價格。海航發言人就話,集團會對投資者履行償債義務。唔知投資者接唔接受呢?

[小琴密語]

相關新聞