深圳公司錢債肉償 以「腿」代息

文章日期:2018年11月10日

【明報專訊】欠債還錢天經地義,但無錢還又可以點?嘿嘿,當然係肉償啦。不過大家咪心邪,小琴講緊係真正嘅肉償。話說呢排內地養豬界備受「非洲豬瘟」影響,疫區封鎖、豬肉禁運,搞到深圳一家豬肉製品上市公司雛鷹農牧啲豬同埋豬肉製品送唔出、賣唔走。

最慘係無生意就無現金,令到雛鷹農牧周轉不靈,而且出現債務違約情况,而禍不單行嘅係,豬肉呢類產品唔係放得好耐,所以管理層既要諗辦法還債,亦要解決庫存問題。但你估佢唔到係,竟然畀佢哋諗出一石二鳥之計。雛鷹農牧前晚就公告,話計劃調整債務支付方式,本金繼續以現金支付,至於利息就主要以公司生產嘅火腿、生態肉禮盒等產品償還,實行「錢債肉償,以腿代息」。公司仲話,已經同小部分債權人達成初步肉償意向,涉及本息總金額2.71億元人民幣。

雖然錢債肉償,以腿代息聽落荒謬,但起碼都叫做肯承擔,似乎內地股民亦受落,唔怪得出完通告後,雛鷹農牧噚日就升停板啦。

[小琴密語]

相關新聞