內地新盤誓師 銷售團隊斬雞飲血

文章日期:2018年7月17日

【明報專訊】近期盛傳各大內房商畀人閂水喉,融資愈嚟愈難,搞到要加快賣樓套現周轉,噚日內地網絡流傳兩張相,影咗一個內地新樓盤嘅銷售團隊舉行誓師大會,會上斬雞飲血,好似古人咁「一乾而盡壯聲勢」,究竟係邊個諗到呢啲咁「復古」嘅方式?

留心睇番張相,地點原來係碧桂園位於福建省漳州市新樓盤御江府。講開又講,其實飲雞血係屬於彝族嘅交際習俗,先倒酒入碗,將一隻大公雞當場殺死,再將血滴入碗,大家一齊舉碗發誓,然後一飲而盡,飲咗雞血酒就代表要信守誓言,唔係就會受神靈懲罰。以前香港唔少黑幫電影都出現過「燒黃紙、斬雞頭」,都係源於呢種習俗。

小琴估計,內地銷售人員諗到飲雞血誓師都係想提高士氣,同心合力賣樓,雖然生飲雞血似乎太殘忍又唔衛生,同香港地產代理為咗爭客打到見紅相比,兩地從業員真係各有千秋。

[小琴密語]

相關新聞