花旗逾百年現首名香港女行長

文章日期:2018年7月13日

【明報專訊】新上任的花旗集團香港及澳門區行長伍燕儀(圓圖)昨日出席就職酒會上演講時,講笑話一個成功男士背後要有一個女人,佢成功係有3個男人,第一個係花旗集團亞太區行政總裁高晉誠,因為得到佢提拔;第二個係過咗恒隆集團(0010)及恒隆地產(0101)候任行政總裁盧韋柏;第三個就係佢老公,因為得到批准同支持先會答應成為花旗116年嚟第一個女行長。

10方鐘演講完:早啲返去睇波

其實小琴好早就識得伍燕儀,2006年忽然劈炮唔做,原因係陪老公去深造。等老公畢業後返嚟香港就重返花旗,𠵱家更加領導4300名香港員工𠻹。

佢形容自己係曼城中場奇雲迪布尼,為前線員工「助攻」,希望令花旗日後業務更上一層樓!前晚女行長就職演說唔夠10分鐘,話畀時間大家返屋企睇英格蘭對克羅地亞喎,佢同老公支持邊隊就無講,不過在場人士大叫英格蘭,相信四強賽事賽果應令在場唔少嘉賓失望。

前晚都有不少商界人士及銀行家出席,包括合和實業創辦人及董事局主席胡應湘、鷹君集團主席及董事總經理羅嘉瑞、新地(0016)主席郭炳聯及「紅籌股之父」梁伯韜等等。伍燕儀喺1988年加入香港花旗銀行,先後出任多項個人銀行業務要職,包括零售銀行業務、銷售和分銷業務、財富管理及信用卡業務主管。

[小琴密語]

相關新聞