黎智英兩度增持壹傳媒

文章日期:2018年7月11日

【明報專訊】雖然世界盃四強開打,但係小琴無偷懶,發現壹傳媒(0282)創辦人黎智英上星期分別兩次用真金白銀入市,唔係買小米(1810),而係買番自己集團嘅股份。根據公開資料顯示,「肥佬黎」上星期二7月3號以每股0.1994元,買入59.2萬股,用咗約11.8萬元。隔一日4號再用近49萬元買入240.8萬股。「肥佬黎」兩度出手之後,所持有嘅壹傳媒股份就由67.82%變成67.94%,多咗0.12%。壹傳媒噚日收市報0.205元,下跌0.49%。

宣布向員工派股 股價跌兩成

壹傳媒上個月宣布完業績,隔兩日再公布派總值約5115萬元嘅公司股份畀員工,做夠1年嘅壹仔可以獲得相當於1個月人工嘅股份,按每股0.25元計算每個員工收幾多股。當時壹傳媒就話,派股係獎勵措施,希望鼓勵大家對集團作出更大貢獻。上月公布派股時壹傳媒股價就係0.25元,之後就一直跌,直至最近跌穿0.2元,「肥佬黎」就出來增持。

email: piano@mingpao.com

[小琴密語]