小股東轟楊元慶袍金過高

文章日期:2018年7月6日

【明報專訊】舊年業績麻麻嘅聯想集團(0992)噚日舉行股東周年大會,有小股東喺會上「爆Seed」鬧爆主席楊元慶,質疑管理層袍金過高,仲足足鬧咗10幾分鐘,雖然楊元慶好冷靜咁解釋,但仍然有超過6%票數反對楊元慶做董事!

6%票反對楊做董事

小股東炮轟管理層,喺過去5個年度有兩個年度都錄虧損,但董事袍金中位數就年年都升,又提到楊元慶一個人嘅薪金已經過億,質疑公司管理層袍金過高,其後楊元慶解釋番話,管理層薪金同集團表現掛鈎,而且董事薪酬委員會會負責檢視薪金,認為𠵱家薪金水平合理。

最後小股東都唔滿意管理層嘅解釋,覺得楊元慶迴避問題。今次大會有重選楊元慶為董事嘅決議案,最後有近6.29%票數反對議案,對比楊元慶喺2015年重選董事個陣有3.99%票數反對,今年足足高咗2.3個百分點,我估楊元慶今年都要加把勁去安撫小股東啦。

[小琴密語]

相關新聞