阿里AI時尚店踩入理大校園

文章日期:2018年7月5日

【明報專訊】阿里巴巴推出嘅人工智能與時尚結合概念店FashionAI將於今日起至7號,喺理大校園內向公眾開放。Fashion AI可以人工智能向消費者推薦個人化搭配(圖),仲有智能鏡面顯示屏可以展示服飾嘅細節,以及揀尺碼。

智能鏡幫助配搭揀尺碼

進入FashionAI前,需要掃描二維碼連接淘寶帳戶。原本以為智能鏡可以先進到令你著上件衫咁去選擇,但明顯小琴諗多咗,鏡面其實同顯示屏一樣,當顧客選擇產品面對鏡面時,系統識別產品後,鏡面就會出現一個視窗,顧客可以喺自行或者用人工智能演算法去搭配唔同產品。

換句話講,顧客依然係要試身嘅,不過由於有電腦幫助,店內倉庫員可提早準備好,顧客揀完就直接去試身,免卻拎住好幾件衫試衫嘅煩惱。喺試衫時,如果遇到唔合適嘅尺碼,只需喺顯示屏上點選,店員就會為顧客配貨。

email: piano@mingpao.com

[小琴密語]