四叔九十大壽 兒孫送書回憶戰績 - 20180317 - 報章內容 財經 - 明報財經網

四叔九十大壽 兒孫送書回憶戰績

文章日期:2018年3月17日

【明報專訊】噚日李嘉誠公布退休,立刻成為全城焦點。但係其實噚日係另一位億萬富豪李兆基(四叔)嘅89歲農曆生日,並且慶祝咗九十大壽。四叔每年大壽,都會喺半山大宅設晚宴,一饗親友,今年更加筵開15席。

搜羅歷年剪報雜誌封面

為表心意,四叔個乖乖仔Martin(李家誠)一家,準備咗一本好有價值嘅書送畀四叔,本書有成100頁,主要係搜羅咁多年四叔喺香港報紙、雜誌嘅新聞,同埋雜誌封面相。小琴八到其中一張剪報係1986年3月24日嘅《明報》報道,話四叔因為熱心幫助香港學生出外讀書,因而獲英國牛津大學華頓學院頒授榮譽院士。

28年資助百名學生 到牛津深造

睇番呢篇報道先知,原來四叔早在1979年已經成立「李兆基學位」計劃,資助香港傑出學生到牛津升學,等佢哋唔會因為經濟困難而冇能力負笈海外。據知,佢喺28年時間裏面資助過百名學生到牛津深造。噚晚四叔睇番呢篇報道,相信都老懷安慰。誠哥言退,未知幾時輪到四叔,但係兩位老人家即使從上市公司退下火線,喺慈善方面都應該唔願停。

email: piano@mingpao.com

[小琴密語]