經濟艙遇上李澤鉅 - 20180316 - 報章內容 財經 - 明報財經網

經濟艙遇上李澤鉅

文章日期:2018年3月16日

【明報專訊】李澤鉅坐經濟艙,可能大家嘅反應都會感到詫異。呢一刻,小琴有幸成為見證。

話說全國兩會要求,參與嘅代表同委員都唔可以坐私人飛機,所以無論幾有錢嘅富豪,都唔會再坐私人飛機上京開兩會。據小琴所知,長和(0001)副主席李澤鉅亦一直冇坐私人飛機嘅習慣。不過咁,即使唔坐私人飛機,佢同一眾有頭有面嘅政協都會選擇坐頭等或者商務位,所以基本上喺經濟艙見到李澤鉅,確係令人出奇。

「趕番香港處理業務」

之不過緣分呢樣嘢又話唔埋嘅,噚日上午政協閉幕,而今日就係長和系4間上市公司同日公布業績、開業績會嘅大日子。殊不知,佢原本坐嗰班機因故取消,臨時改坐國泰港龍,但因商務艙已爆滿,被安排坐經濟艙,不過國泰都好貼心,安排佢坐近機尾位置,同其他政協一齊。機會難逢,小琴當然要同阿李生Say番個Hi。可能冇估到有人認出自己,李澤鉅一開始都有啲反應唔切,不過之後都有講有笑,話要趕番香港處理業務,業績會就會見大家。喺兩會期間見到記者,李澤鉅都不多回應,噚日喺飛機可能已忙完「政」事,見佢都輕鬆好多。

email: piano@mingpao.com

[小琴密語]