萬達棄西甲重投中超 - 20180223 - 報章內容 財經 - 明報財經網

萬達棄西甲重投中超

文章日期:2018年2月23日

【明報專訊】萬達舊年被人點名批評做太多海外投資,搞到要頻頻賣番走啲海外項目,噚日有內地傳媒引述消息話,萬達早排賣走西甲球隊馬體會之後,會重返中國足壇,接手剛剛升上中超嘅大連一方足球隊。

內地網站《新浪財經》報道話,今次萬達「棄西甲奔中超」消息已經獲萬達一位管理層人士確認,不過因為中超新賽季嘅球隊准入已經完成,所以今個賽季搞唔到股權轉讓,只可以冠名先,而萬達公關負責人暫未回覆。

20年前曾入主同一球隊

事實上,萬達喺1994年入主大連萬達足球隊,喺1999年將球隊易手畀實德集團,但球會最終喺2012年解散,被同城另一球隊大連阿爾濱收購,而2015年大連阿爾濱又被大連一方收購,仲改名做大連一方足球隊,意味萬達事隔約20年後,再度入主同一間球隊。

[小琴密語]