短訊電話滋擾多 阿里主管被「照肺」 - 20180125 - 報章內容 財經 - 明報財經網

短訊電話滋擾多 阿里主管被「照肺」

文章日期:2018年1月25日

【明報專訊】讀書時期有班長、風紀負責捉「頑皮」學生,內地科技界都有個風紀,就係工信部,專捉「曳曳」嘅科技公司。

工信部噚日話,阿里巴巴通信技術(北京)連續3季被舉報發出垃圾短訊、騷擾電話嘅問題愈嚟愈嚴重,舉報量同舉報排名係咁升。工信部信息通信管理局仲搵咗阿里通信嘅主要負責人「照肺」,要求阿里高度重視,切實落實企業責任,採取針對性措施,加強垃圾信息治理。

其實喺今年初,多間知名嘅互聯網公司都被「爆料」泄漏用戶資訊,支付寶、百度、今日頭條等都被「點名」,引起唔少人關注個人資料私隱問題,工信部都有搵咗呢3間公司「見下面」。阿里係咁被「風紀」捉,真係要「乖」啲啦。

email: piano@mingpao.com

[小琴密語]