日本信用卡JCB開發「手掌支付」 - 20180106 - 報章內容 財經 - 明報財經網

日本信用卡JCB開發「手掌支付」

文章日期:2018年1月6日

【明報專訊】今時今日,買嘢除咗可以用人臉識別技術嚟畀錢,隨時用手掌畀錢都得!最近日本信用卡公司JCB開發緊手掌支付技術,用戶只需要用智能手機嘅相機,影返張手掌相嚟做登記,系統就可以透過手掌外觀同埋血管分佈嚟辨別用戶身分。

測試1000億次僅一次身分誤判

已登記用戶買嘢畀錢嗰陣,唔使用信用卡或者手機,商戶唔使安裝任何專用嘅裝置,只需要用普通智能手機相機,掃描用戶嘅手掌,掃一掃就搞掂咗付款程序。

根據目前測試結果,呢個技術響1000億次入面先得一次身分誤判,而JCB下個月亦會先等員工試驗「刷手支付」,睇下有冇其他安全問題,冇嘅話就會盡快推出呢項技術。

小琴就覺得呢項技術推出之後,大家出街咩都唔洗帶就可以買嘢,就算手機冇電都唔怕,算係好方便。不過,生物辨識技術嘅發展真係愈嚟愈快,唔知下一步會係用身體邊一個部分畀錢呢?

email: piano@mingpao.com

[小琴密語]