超人基金會 否認撤出汕頭大學 - 20171129 - 報章內容 財經 - 明報財經網

超人基金會 否認撤出汕頭大學

文章日期:2017年11月29日

【明報專訊】超人李嘉誠一直都當汕頭大學係心肝寶貝,不過內地傳出,超人旗下嘅李嘉誠基金會汕頭大學嘅辦公室已經被「除牌」,噚日汕頭大學同基金會相繼否認,基金會仲澄清話,佢哋只係按規定,將幾個辦公室合併搬到深圳。

只係「合併辦公室遷往深圳」

江湖傳聞,李嘉誠基金一直以來都係直接資助幾個學院,拒絕校方「資金要先通過學校,再到學院」嘅要求;學校就以「學院聘請教授、教師,或者舉辦活動都應先通過學校批准」作回應;而雙方因為對有關問題未有共識,所以李嘉誠基金就此撤退。

噚日李嘉誠基金會澄清,對從汕頭大學撤退嘅消息感到莫名其妙,佢哋只係按有關境外慈善機構嘅最新規定,將基金會喺國內嘅幾國個辦公室合併搬去深圳。

基金會仲話眾所周知李嘉誠對汕頭大學係「超越生命的承諾」,喺基金會內甚至有特別為汕頭大學基金會而設嘅獨立立項。汕頭大學仲話對於網絡上嘅不實言論,保留訴諸法律嘅權利。

[小琴密語]