阿里伙FIFA 搞高科技睇波 - 20171123 - 報章內容 財經 - 明報財經網

阿里伙FIFA 搞高科技睇波

文章日期:2017年11月23日

【明報專訊】早排馬雲拍完電影《功守道》,大曬太極真功夫後,阿里巴巴繼續踩過界,宣布同國際足協(FIFA)展開一項至2022年嘅合作,唔通馬雲做完武林高手,小琴不禁幻想,馬雲下次拍電影會唔會改行踢波?

阿里巴巴噚日宣布,旗下阿里雲會同FIFA 合作,引入全新觀賞體驗,阿里深副總裁兼阿里雲總裁胡曉明話,會用科技為球迷帶來全新視角嘅娛樂享受,尤其係個啲以前好難參與FIFA賽事嘅人都可以享受其中喎。FIFA市場銷售及策略董事Iain Downie就話,阿里雲喺科技支援同全球化服務方面,創造極大嘅商業價值,同阿里雲合作,睇到巨大嘅潛在機遇。阿里仲話,集團作為指定贊助商,將會負責設計最具價值球員(MVP)獎盃,呢個獎盃噚日喺廣州雲棲大會首度現身。小琴心諗,阿里有份設計獎盃,唔知呢個獎盃喺下年雙十一有無得「淘」呢?

[小琴密語]