梁伯韜膺花旗「卓越舊生」 - 20170915 - 報章內容 財經 - 明報財經網

梁伯韜膺花旗「卓越舊生」

文章日期:2017年9月15日

【明報專訊】日前花旗集團舉行「舊生及銀禧職員會晚宴」,唔單止現任員工,好多前同事都有出席,當中包括金融界無人不知嘅「紅籌之父」梁伯韜。梁生除咗同一班舊同事聚舊之外,更重要係要領獎!

當晚梁伯韜以花旗集團前環球金融亞太區主席嘅身份,獲頒發「卓越舊生獎」,以嘉許梁生喺引進紅籌國企入香港股票市場嘅成就,以及佢對提升花旗集團喺大中華地區競爭優勢所作出嘅貢獻。

想當年梁伯韜喺1988年同佢嘅舊上司杜輝廉合資創辦私人銀行百富勤投資,幫過唔少紅籌國企嚟香港上市,公司仲獲得唔少華人富豪包括:李嘉誠、胡應湘同香植球等支持,「卓越舊生獎」呢個獎絕對係實至名歸。梁伯韜喺得獎致辭嘅時候話,喺花旗集團工作咗咁多年,從好多銀行業界嘅前輩同同業身上學咗好多嘢,令佢一生受用,佢為集團以及金融業界嘅發展只係略盡綿力啫,難得梁生仲咁謙,小琴真係要好好學習。

[小琴密語]