老任新偉論:港股人幣計價 - 20170915 - 報章內容 財經 - 明報財經網

老任新偉論:港股人幣計價

文章日期:2017年9月15日

【明報專訊】行政會議成員任志剛曾提議港元同人民幣掛鈎,又多次強調港元唔會被邊緣化,噚日又有偉論,今次提出港股應該引進人民幣計價。

任志剛話,港股可以引進人民幣計價、交易同結算,除咗有助人民幣國際化,畀投資者用佢哋嘅本土貨幣做交易單位,就唔使承受任何貨幣風險。任總嘅理由係,港元只係一個700萬人經濟體嘅貨幣,要為一個13億人、屬全球第二大經濟體嘅內地,提供與外地之間的資金活動,係不切實際。佢仲話,內地同外地嘅投資者與集資者,係利用港元做交易時,可能會關心所貨幣風險同對冲有效性。

不過,任總作為金管局前總裁,無理由唔知道港元同美元掛鈎,貨幣一定穩定過人民幣。最近人民幣大上大落,單日波幅可達到1%,但港元就定死咗喺7.75至7.85之間,波動有限。况且港元同美元嘅對冲工具,遠遠多過人民幣。所以任總用貨幣風險同對冲有效性作理由,小琴真係諗極都唔明呀。

email: piano@mingpao.com

[小琴密語]