搭的士可碌卡 金管局高層夠好彩 - 20170825 - 報章內容 財經 - 明報財經網

搭的士可碌卡 金管局高層夠好彩

文章日期:2017年8月25日

【明報專訊】噚日係金管局初次發出儲值電子支付(SVF)嘅一周年,作為金管局高級助理總裁嘅李達志,趁機喺《匯思》寫文講一講香港電子支付嘅情况。

李達志喺篇文度就提到,愈來愈多商戶明白電子支付嘅好處,好似佢上星期搭的士,就上咗架裝左信用卡讀卡機嘅的士,而司機仲好笑容可掬咁話,佢車行未來會加裝其他電子收款嘅渠道,畀司機同乘客更多選擇。喺香港,唔少人都投訴的士司機態度唔好,以致政府近年大推優質的士服務,鼓勵業界提高的士服務質素。另外,香港的士數量有18,000部,但當中支援信用卡付款嘅,半成都無。李達志就真係夠好運啦,兩樣都比佢遇到。

雖然李達志話香港人對電子支付唔陌生,八達通同信用卡的確係好普遍,但SVF普及程度好明顯唔夠內地嚟,小琴就試過係大陸見到係街邊買龍眼都可以微信支付,真係唔知幾時先可以隨時截到架可以用卡畀錢嘅的士呢。

[小琴密語]