小肥牛上市走樣 15月蝕千萬

文章日期:2017年8月3日

【明報專訊】生意難做,定上咗市後生意特別差?今年初上市嘅「邊爐股」國茂(8428),上市半年左右就發咗個盈警,除咗回帶返招股書講,上市費用要找數、有啲舖要結業之外,唔知係咪天氣太熱,連旗下小肥牛生意都差咗,估計單係4至6月就要蝕600萬。

呢幾年好多本地飲食公司上市,單係數得出名嘅,除咗小肥牛,仲有越棧、Volar,都未計仲排緊隊嘅麻酸樂,唔講以為做飲食好好賺,但如果睇番業績條數,大部分都係好一般,用番小肥牛母公司國茂做例子,2016年3月底止財年賺咗800萬左右,但2017財年已經蝕番800萬,加埋今年4至6月,15個月內蝕過千萬。

小琴老友話,香港做飲食最大問題係請人,但如果講條數,有心做的話要賺幾百萬始終唔難,但啲公司上市後就走晒樣,到底係上咗市後目標達成無心機搞,定係一早估到個市已到頂係時候賺多筆撤退,真係要老闆自己先知。

[小琴密語]