樂視債主「瞓身」追數 - 20170706 - 報章內容 財經 - 明報財經網

樂視債主「瞓身」追數

文章日期:2017年7月6日

【明報專訊】樂視早兩日爆出創辦人賈躍亭同樂視控股嘅股權被凍結,凍結期要成3年,加上樂視出晒名鍾意拖數,唔知債主們係咪擔心樂視前景愈嚟愈唔掂,噚日「瞓身」踩上門去位於北京嘅樂視總部追債!

內媒《每日經濟新聞》記者噚日去咗樂視總部視察,見到門外有幾十個人鋪晒地布,甚至除埋鞋攤喺度(圖),令小琴聯想到啲人通宵排隊撲演唱會飛嘅畫面。不過佢哋唔係嚟撲飛,而係嚟「撲水」!原來佢哋有部分係廣告供應商,早兩日已經留守樂視總部追債,受影響嘅商戶共有19間,估計樂視有6000萬人仔街數未找。

樂視影業股權 近全數押於融創

樂視新聞日日新鮮,除咗被人上門追債,騰訊財經亦爆出賈躍亭原來已幾乎將持有樂視影業嘅所有股權,抵押畀孫宏斌旗下嘅融創(1918)。根據內地工商資料,原來融創喺樂視影業嘅出資額已經達到1.75億元人民幣,持股由15%升到21%,計埋呢批抵押股份,股權分分鐘已經大過賈躍亭!其實唔止樂視影業,樂視致新(電視業務)、樂視網、樂視體育、樂視汽車(北京)等都有股份被抵押,難怪有分析人士話,賈躍亭已經將槓桿用到極致喇!

email: piano@mingpao.com

[小琴密語]