艾碩小股東要求罷免現有董事會

文章日期:2017年5月26日

【明報專訊】如果你買咗股票嘅公司業績變差,但又無具體解釋原因,你會點做?今年1月新上市嘅創業板半新股艾碩控股(8341)早排就話,被5個持股合共超過10%嘅小股東提議,罷免現有董事會,原因竟然喺「唔滿意公司對毛利率下跌嘅解釋」,仲請來曾經逼到中巴(0026)大手派特別息,同埋當年逼到南太電子私有化嘅「資本獵手」禹銘做顧問,照咁睇呢幾個「小股東」都相當唔簡單。

搵「資本獵手」禹銘做顧問

小琴好奇就問唔鍾意公司表現未抽身離場囉,但小股東代表之一嘅曾憲海就好有正義感咁同小琴講,自己係專業投資者唔係炒家,而小股東都有責任監察公司嘅發展,如果就咁「拋棄」咗公司就會畀人覺得好無責任感,又話因為唔知究竟邊個董事做得唔好,公平起見不如一次換埋。雖然小琴承認自己有時會貪啲小便宜,但噚日先意識到原來自己喺一個好唔負責嘅投資者。到底成件事有無其他內情,小琴不得而知,惟有食住花生,睇下呢齣「董事風雲」會唔會喺6月12號嘅股東大會度公映囉。

[小琴密語]