金發局:盼新特首畀多啲資源 - 20170517 - 報章內容 財經 - 明報財經網

金發局:盼新特首畀多啲資源

文章日期:2017年5月17日

【明報專訊】金發局由梁振英一手策劃同促成,𠵱家政府即將換屆,好多人都關心金發局嘅未來。但主席查史美倫噚日就話,候任特首林鄭月娥認為金發局有貢獻,會繼續做落去,仲期望金發局喺佢政綱提到嘅「金融領導委員會」中發揮作用。

冀成法定機構 運作更順暢

雖然傳聞話佢係財政司人選之一,但史美倫就話會擔任金發局主席至2019年任期屆滿為止。咁係咪即係角色不變?但史美倫唔希望一切照舊,因為佢唔滿意𠵱家金發局嘅資源太少,呼籲下屆政府要投放多啲資源咁話。

另外,史美倫又向小琴埋怨,金發局過往寫咗唔少報告,提出過好多建議,但政府喺落實方面,似乎效率欠奉。佢又希望金發局可以成為法定機構,「財庫局應該向呢個方向諗」。雖然成為法定機構唔代表工作性質有變,但佢話,至少可以令財政來源更清晰、資源更多同運作更順利。

email: piano@mingpao.com

[小琴密語]