趙薇腹背受敵 新華社狠批萬家 - 20170217 - 報章內容 財經 - 明報財經網

趙薇腹背受敵 新華社狠批萬家

文章日期:2017年2月17日

【明報專訊】「環珠格格」趙薇呢排真係一身蟻,原本諗住問銀行借錢買間A股殼公司萬家文化,等自己可以一嘗做上市公司大股東嘅滋味,點知被媒體質疑佢背後有內地居港商人肖建華撐腰,結果銀行拒絕借錢,搞到佢收購規模要大縮水之餘,成單交易仲惹來上交所關注,就連官媒都加入砲轟。

新華社噚日就發表評論文章批評,趙薇要收購嗰間萬家文化「談不上是一個正常企業」,因為過去幾年間公司經常主業轉型,潮流興邊樣就轉去做邊樣,但做親都蝕錢。文章仲列出,呢間萬家文化早期搞過地產同酒店,搞唔掂就走去做礦業,之後又話搞有色金屬;到早兩年內地流行動漫遊戲,又賣走蝕緊錢嘅礦業同地產業,走去搞動漫。

斥不斷轉主業 非正常企業

大家睇完覺唔覺呢間公司做生意真係「3分鐘熱度」?呢次賣殼不成仲要俾官方咁樣狂插,睇怕要翻身都有排。

[小琴密語]