金融創新演變「關公災難」

文章日期:2017年2月9日

【明報專訊】金融創新竟變成災難!小琴講緊咩恐怕讀者都估到,皆因匯豐落重本推銷嘅轉帳App「PayMe」噚日面世,好多人一早就諗住試用,點知因為太多人登入搞到冧Server,成為另一「關公災難」。查實小琴噚晚已成功登入,不過災難已經造成,唔單止之後好難執番好個形象,日後匯豐仲願唔願意搞金融創新或成問題。

小琴同同事噚日朝早已快手下載PayMe,但一直到中午都註冊唔到。匯豐發言人證實因流量高,所以部分客戶未能下載登入。小琴望番iOS個評分,得個可憐的2.5星,留言都係鬧爆為主。

不過,如果有讀者鍥而不捨嘅話,就會發現夜晚個App已經可以登入番,小琴試過成功連結儲蓄戶口同信用卡戶口,似乎暫時各項功能都正常,不過容易冧Server嘅問題恐怕仍未解決,皆因部分功能好似連結信用卡,竟然足足等咗超過15分鐘囉。

其實香港好需要金融創新,如果唔係PayMe都唔會咁受注目,希望今次唔好一下就打沉匯豐嘅雄心啦。

email: piano@mingpao.com

[小琴密語]