領軍人離職 萬達回歸A股恐受阻

文章日期:2016年12月7日

【明報專訊】係人都知道首富王健林好想將萬達A股上市,唔係都唔會搞咁多動作,之不過日前一個人事變動嘅消息,令人不禁擔心萬達回歸A股之路真係阻礙重重。早兩日,萬達宣布集團旗下萬達金融副總裁兼投資公司首席執行官陸肖馬(圖)因個人原因離職。

王健林重金禮聘陸肖馬

睇返陸肖馬背景一啲唔簡單,2012年,深交所對外公開招聘副總經理,陸肖馬就被相中,成為深交所上市公司監管部門副總經理。到去年,王健林成立萬達金融,陸肖馬竟然畀佢挖返來擔任要職。有指,王健林除咗非常睇重萬達金融,對其期望極大之外,有消息指,王健林重金聘請陸肖馬另一主要原因,係看中佢響深交所多年,對於萬達A股上市會發揮重要作用。

之不過大家如果唔善忘嘅話,應該記得前排有隻深圳上市嘅殼股綿石投資自行宣布終止萬達借殼計劃,搞到萬達嬲嬲豬話對方係單方面炒作,雙方只不過初步接洽,並無深入傾談。小琴好奇,唔知兩件事會唔會有關係呢?

email: piano@mingpao.com

[小琴密語]