港航兩董事長難得現身 - 20161129 - 報章內容 財經 - 明報財經網

港航兩董事長難得現身

文章日期:2016年11月29日

【明報專訊】香港航空噚晚舉辦十周年啟航酒會,過往甚少露面嘅港航兩位聯席董事長蒙建強及張逵,難得齊齊露面。主禮嘉賓行政長官梁振英就把握機會,喺致辭時提到今年年初施政報告內提及由機管局成立民航學院。特首嘅民航學院未有著落,不過香港航空就已經先行配合,張逵噚晚致辭時提到,港航斥資18億嘅飛行培訓中心預計喺2018年底落成,培訓更多航空業人才。

梁振英特別提到「一帶一路」

港航喺2006年由一間經營直升機嘅公司化身成航空公司,發展10年已擁有34架飛機,經營亞太地區36個航點。梁振英喺致辭時特別提到,香港航空嘅航線延伸至哈薩克斯坦的阿拉木圖,同埋阿聯酋的阿布札比,又話香港航空可配合國家「一帶一路」嘅發展策略。小琴隨即喺現場聽到出席十周年酒會嘅嘉賓低頭細語,說阿拉木圖只係港航嘅聯營航線,而唔係港航36個航點之一。經小琴查找,發現香港至阿拉木圖航線係由阿斯塔納航空經營,而阿布札比航線是由中東Etihad經營,兩條航線均只是港航的聯營航線。

港航下年將接收首架A350客機,並開辦北美溫哥華航線,稍後將開辦更多北美及歐洲長途航班,相信對國泰(0293)嘅威脅將會愈嚟愈明顯。

email: piano@mingpao.com

[小琴密語]